ఇరుగుపొరుగు దేశాలను దెబ్బతీయడానికి ఉగ్రవాదాన్ని ఒక వ్యూహాత్మక ఆయుధంగా ఉపయోగించిన పాకిస్తాన్, ఇప్పుడు తానే తవ్వుకున్న గోతిలో తానే పడిపోయే స్థితికి చేరుకుంది. భారతదేశం, ఆఫ్ఘనిస్తాన్ దేశాలలో అలజడి సృష్టించేందుకు పాక్ సైన్యం, అక్కడి గూఢచార సంస్థ (ISI) ఏ ఉగ్రవాద సంస్థలకైతే నిధులు, ఆయుధాలు ఇచ్చి పెంచి పోషించాయో, ఇప్పుడు అవే సంస్థలు పాకిస్తాన్ మనుగడకే పెను సవాలుగా మారాయి. పాకిస్తాన్ ప్రస్తుతం తన చరిత్రలోనే అత్యంత ఘోరమైన అంతర్గత భద్రతా సంక్షోభాన్ని ఎదుర్కొంటోంది.
విదేశాంగ విధానంలో భాగంగా ఉగ్రవాదాన్ని ఒక అనధికారిక సాధనంగా వాడుకున్న ఆ దేశం, ఇప్పుడు ఆ ఉగ్రభూతం చేతిలోనే బలైపోతోంది. గత కొంతకాలంగా జరుగుతున్న ఉగ్ర దాడుల వల్ల వందలాది మంది పాక్ సైనికులు, పోలీసులు, సామాన్య పౌరులు ప్రాణాలు కోల్పోతున్నారు. ఇటీవల జమాత్-ఉల్-అహ్రార్ అనే ఉగ్ర సంస్థ రేంజర్స్ ప్రాంతీయ ప్రధాన కార్యాలయంపై జరిపిన దాడి ఈ విషయాన్ని మరోసారి నిరూపించింది. పాకిస్తాన్కు ప్రస్తుతం ఎదురవుతున్న అతిపెద్ద ముప్పు ‘తెహ్రీక్-ఇ-తాండ్రిక్ పాకిస్తాన్’ (TTP) నుంచి వస్తోంది.
ఈ సంస్థ పాకిస్తాన్ రాజ్యాంగాన్ని, అక్కడి ప్రజాస్వామ్య వ్యవస్థను మరియు మిలిటరీని పూర్తిగా తిరస్కరిస్తోంది. పాక్లో ప్రజాస్వామ్యాన్ని కూల్చేసి, దాని స్థానంలో కఠినమైన ‘షరియా ఆధారిత’ వ్యవస్థను తీసుకురావడమే దీని ప్రధాన లక్ష్యం. 2021 ఆగస్టులో ఆఫ్ఘనిస్తాన్లో తాలిబన్లు అధికారాన్ని చేజిక్కించుకున్న తర్వాత, పాక్ సరిహద్దుల్లోని టీటీపీ ఉగ్రవాదులకు సరికొత్త బలం వచ్చింది. పాకిస్తాన్లో ప్రస్తుతం నెలకొన్న బలహీనమైన ప్రజాస్వామ్యం, పౌర-సైనిక విభేదాలు, మరియు తీవ్రమైన ఆర్థిక సంక్షోభం ఉగ్రవాద సంస్థలకు వరంగా మారాయి.
దేశంలో పెరుగుతున్న పేదరికం, ఆకాశాన్నంటుతున్న నిరుద్యోగం వల్ల నిరాశకు గురవుతున్న యువతను ఈ సంస్థలు సులభంగా తమ వైపునకు తిప్పుకుంటున్నాయి. వెనుకబడిన ప్రాంతాల ప్రజల్లో ప్రభుత్వంపై ఉన్న కోపాన్ని, జిహాదీ భావజాల ప్రచారానికి వాడుకుంటూ కొత్త క్యాడర్ను రిక్రూట్ చేసుకుంటున్నాయి. పాకిస్తాన్-ఆఫ్ఘనిస్తాన్ మధ్య ఉన్న 2,640 కిలోమీటర్ల పొడవైన ‘డ్యూరాండ్ లైన్’ సరిహద్దు కొండ ప్రాంతాలతో కూడి ఉండటం వల్ల అక్కడ ప్రభుత్వ నిఘా చాలా తక్కువగా ఉంటుంది. అందువల్ల పాక్ సైన్యం భారీ సైనిక దాడులు చేసినప్పటికీ, ఉగ్రవాదులు ఈ సరిహద్దుల గుండా తప్పించుకుని తిరిగి పుంజుకుంటున్నారు. ప్రస్తుతం పాకిస్తాన్లో తెహ్రీక్-ఇ-తాండ్రిక్ పాకిస్తాన్ (TTP) వంటి ఇస్లామిక్ ముఠాలతో పాటు బలూచిస్తాన్ లిబరేషన్ ఆర్మీ (BLA) వంటి విప్లవ ముఠాలు కూడా విపరీతంగా విస్తరిస్తున్నాయి.
