మధ్యప్రదేశ్ రాజధాని భోపాల్లో ఒక విచిత్రమైన ఉదంతం వెలుగులోకి వచ్చింది. సాధారణంగా గృహహింస, వేధింపులు, లేదా మనస్పర్థల వల్ల దంపతులు విడాకులకు అప్లై చేయడం చూస్తుంటాం. కానీ ఇక్కడ భార్య తన భర్త గురక పెడుతున్నాడనే ఏకైక కారణంతో కోర్టు మెట్లు ఎక్కింది. తన భర్త ఎంతో మంచివాడని, అత్తమామల ప్రవర్తన కూడా చాలా బాగుంటుందని కౌన్సిలింగ్ సందర్భంగా ఆమె పేర్కొంది. అయితే, రాత్రి వేళల్లో ఆయన పెట్టే భయంకరమైన గురక శబ్దాల వల్ల తాను నిద్రలేని రాత్రులు గడుపుతున్నానని, ఈ మానసిక ఒత్తిడిని భరించడం తనవల్ల కావడం లేదని స్పష్టం చేస్తూ విడాకులు కావాలని పట్టుబట్టింది.
ఈ కేసును భోపాల్కు చెందిన సీనియర్ ఫ్యామిలీ కౌన్సిలర్ రీటా తులి విచారించారు. ఆమె తెలిపిన వివరాల ప్రకారం.. భార్య రోజూ ఉదయాన్నే గురక సమస్యను భర్త దృష్టికి తీసుకెళ్లగా, ఆయన మాత్రం తాను అసలు గురక పెట్టడం లేదంటూ వాదించేవాడు. ఈ చిన్న విషయం కాస్తా నిత్యం ఉదయపు గొడవలకు దారితీసింది. ఇద్దరి మధ్య ఎలాంటి శారీరక లేదా మానసిక వేధింపుల ఆరోపణలు లేనప్పటికీ, కేవలం నిద్రలేమి కారణంగా ఆ భార్య విడాకులే ఈ సమస్యకు ఏకైక పరిష్కారమని బలంగా నమ్మింది.
విడాకుల ప్రక్రియను ముందడుగు వేయడానికి ముందు కౌన్సిలర్ రీటా తులి దంపతులకు ఒక వినూత్నమైన సలహా ఇచ్చారు. తొందరపడి చట్టపరమైన నిర్ణయాలు తీసుకోకుండా, ఇద్దరూ మూడు నెలల పాటు విడివిడిగా జీవించాలని సూచించారు. చిన్నపాటి చిరాకులకు, నిజమైన అనుకూలత లోపానికి మధ్య ఉన్న తేడాను గుర్తించడానికి ఈ తాత్కాలిక దూరం సహాయపడుతుందని ఆమె భావించారు. కౌన్సిలర్ చెప్పినట్లుగానే ఆ దంపతులు మూడు నెలల పాటు దూరంగా ఉన్నారు.
మూడు నెలల విడివిడి జీవితం తర్వాత ఆ జంట మళ్లీ కౌన్సిలింగ్ సెషన్కు హాజరై ఒక ఊహించని సమాధానం చెప్పారు. తాము దూరంగా ఉన్న సమయంలో ఒకరినొకరు ఎంతగానో మిస్ అయ్యామని కోర్టుకు వెల్లడించారు. రాత్రి పూట వచ్చే గురక శబ్దం కంటే, తమ మధ్య ఉన్న ప్రేమానురాగాలే ఎంతో విలువైనవని తాము గ్రహించామని ఒప్పుకున్నారు. గురక లాంటి తాత్కాలిక శారీరక సమస్య కోసం అంతటి అద్భుతమైన వైవాహిక బంధాన్ని తెంచుకోవడం పెద్ద తప్పిదమని భావించిన ఆ దంపతులు, తమ విడాకుల నిర్ణయాన్ని వెనక్కి తీసుకుని మళ్లీ కలిసి జీవించడానికి సంతోషంగా అంగీకరించారు.
