ఆంధ్రప్రదేశ్లో త్వరలో ఖాళీ కానున్న 4 రాజ్యసభ స్థానాల భర్తీకి సమయం దగ్గరపడుతుండటంతో, అధికార కూటమిలో అభ్యర్థుల ఎంపికపై సర్వత్రా ఆసక్తి నెలకొంది. అసెంబ్లీలో కూటమికి ఉన్న భారీ బలం ప్రకారం ఈ నాలుగు సీట్లు సొంతం చేసుకోవడం దాదాపు ఖాయం. అయితే, సామాజిక సమీకరణాల్లో భాగంగా ‘కమ్మ’ సామాజికవర్గానికి కేటాయించే ఒక సీటు కోసం ప్రస్తుతం ప్రముఖ విద్యాసంస్థల అధినేత భాష్యం రామకృష్ణ పేరు తెరపైకి వచ్చింది. పార్టీ కోసం సుదీర్ఘకాలంగా సేవలందిస్తున్న ఆయనకే ఈసారి రాజ్యసభ సీటు దక్కే అవకాశాలు ఎక్కువగా ఉన్నాయంటూ అమరావతి రాజకీయ వర్గాల్లో గట్టి టాక్ వినిపిస్తోంది.
Also read: Ys jagan: ప్యాలెస్ లో జగన్ సడెన్ మీటింగ్, రెండేళ్ళ పాలనే టార్గెట్ గా..?
భాష్యం రామకృష్ణకు తెలుగుదేశం పార్టీతో, ముఖ్యంగా నారా చంద్రబాబు నాయుడు, నారా లోకేష్లతో దశాబ్ద కాలానికి పైగా అత్యంత దగ్గరి సంబంధాలు ఉన్నాయి. గత కొన్ని ఎన్నికల నుంచి ఆయన ప్రత్యక్ష రాజకీయాల్లోకి రావాలని, టీడీపీ తరఫున లోక్సభ లేదా అసెంబ్లీ స్థానం నుండి పోటీ చేయాలని గట్టి ప్రయత్నాలు చేశారు. పార్టీ కోసం ఆర్థికంగా, సామాజికంగా అండగా ఉంటూ వస్తున్నప్పటికీ.. పొత్తులు, సామాజిక సమీకరణాల కారణంగా గతంలో ఆయనకు టికెట్ దక్కలేదు. అయినప్పటికీ ఆయన పార్టీ గీత దాటకుండా, క్రమశిక్షణ గల నాయకుడిగా ఉంటూ కూటమి విజయం కోసం క్షేత్రస్థాయిలో గట్టిగా పనిచేశారు.
ఈ సుదీర్ఘ నిరీక్షణకు గుర్తింపుగా చంద్రబాబు ఈసారి ఆయనను పెద్దల సభకు పంపడం ఖాయమనే ప్రచారం సాగుతోంది. రాష్ట్రవ్యాప్తంగా లక్షలాది మంది విద్యార్థులకు నాణ్యమైన విద్యను అందిస్తూ, విద్యా రంగంలో అత్యంత ప్రతిష్టాత్మకమైన గుర్తింపును సంపాదించుకోవడం ఆయనకు ఉన్న అతిపెద్ద ప్లస్ పాయింట్. గుంటూరు, కృష్ణా మరియు పరిసర జిల్లాల్లో కమ్మ సామాజికవర్గంలో రామకృష్ణకు మంచి పట్టు ఉంది. అలాగే పార్టీకి అవసరమైన సమయంలో అండగా నిలవగల ఆర్థిక సత్తా ఆయనకు ఉంది.
Also read: Supreme Court: కాక్రోచ్ పార్టీపై పిటిషన్.. సీజేఐ కీలక వ్యాఖ్యలు..!
పారిశ్రామిక, విద్యా రంగంలో ఉన్నప్పటికీ ఆయనపై ఎలాంటి వివాదాలు లేవు. మచ్చలేని నాయకుడిగా, చదువుకున్న విద్యావంతుడిగా పార్లమెంట్లో పార్టీ వాయిస్ను వినిపించడానికి ఆయన సరైన అభ్యర్థి అని పార్టీ వర్గాలు భావిస్తున్నాయి. నారా లోకేష్ నేతృత్వంలోని యువ రక్తం, చదువుకున్న నేతల టీమ్లో రామకృష్ణకు మంచి ప్రాధాన్యత ఉంది. భవిష్యత్తు రాజకీయాల దృష్ట్యా ఇలాంటి విజన్ ఉన్న నేతలను ప్రోత్సహించడం పార్టీకి లాభిస్తుందని అధిష్టానం యోచిస్తోంది. గతంలో చేజారిన లోక్సభ అవకాశాలను దృష్టిలో ఉంచుకుని, ఈసారైనా పెద్దల సభ (రాజ్యసభ) ద్వారా పార్లమెంట్లో అడుగుపెట్టాలని భాష్యం రామకృష్ణ వర్గీయులు గట్టి నమ్మకంతో ఉన్నారు. చంద్రబాబు నాయుడు కూడా సీనియారిటీ, నిరంతర సేవలను గౌరవిస్తూ రామకృష్ణ వైపే మొగ్గు చూపే అవకాశం స్పష్టంగా కనిపిస్తోంది.
