దేశంలో ప్రజారోగ్యంపై ప్రభుత్వ పెట్టుబడులు గత దశాబ్ద కాలంలో ఊహించని రీతిలో పెరిగాయి. కేంద్ర ఆరోగ్య మంత్రిత్వ శాఖ విడుదల చేసిన తాజా ‘నేషనల్ హెల్త్ అకౌంట్స్’ (NHA) నివేదిక ప్రకారం, 2013-14 ఆర్థిక సంవత్సరంలో కేవలం రూ. 1.3 లక్షల కోట్లుగా ఉన్న ప్రభుత్వ ఆరోగ్య వ్యయం, 2022-23 నాటికి ఏకంగా రూ. 3.85 లక్షల కోట్లకు చేరుకుంది. అంటే దాదాపు పదేళ్ల కాలంలో ప్రభుత్వం ప్రజల ఆరోగ్యం కోసం పెట్టే ఖర్చు మూడు రెట్లు పెరిగినట్లు స్పష్టమవుతోంది. దేశ జీడీపీ (GDP) లో ఆరోగ్య వ్యయం వాటా కూడా 1.15 శాతం నుండి 1.43 శాతానికి పెరగడం విశేషం.

Also Read: అసలు ఏంటి ఈ పబ్లిక్ ఎగ్జామినేషన్స్ అమెండ్‌మెంట్ బిల్ 2026..?

ప్రభుత్వ నిధుల కేటాయింపులు పెరగడం వల్ల సాధారణ కుటుంబాలపై పడే వైద్య ఖర్చుల భారం గణనీయంగా తగ్గింది. గతంలో 2013-14లో ఒక కుటుంబం తమ మొత్తం ఆరోగ్య అవసరాల కోసం సొంత జేబుల నుండి 64.2 శాతం ఖర్చు చేయాల్సి రాగా, 2022-23 నాటికి అది 43.4 శాతానికి పడిపోయింది. ఉచిత వైద్య సదుపాయాలు, ప్రభుత్వ ఆసుపత్రుల బలోపేతం మరియు వైద్య బీమా వంటి సౌకర్యాలు విస్తృతం కావడం వల్లే సామాన్యుడికి ఈ భారీ ఊరట లభించిందని ఆరోగ్య మంత్రిత్వ శాఖ వెల్లడించింది. ఒక వ్యక్తి ప్రాతిపదికన చూసుకుంటే, ప్రభుత్వం తలసరి ఆరోగ్య వ్యయాన్ని దశాబ్దంలో రూ. 1,042 నుండి రూ. 2,786 కు పెంచింది.

Also Read: రిటైర్డ్ అధికారి అంటే ఎందుకు సార్ అంత ముద్దు..?

ఆరోగ్య భద్రత కల్పించే ప్రభుత్వ సామాజిక పథకాలకు కూడా నిధుల ప్రవాహం పెరిగింది. ఆయుష్మాన్ భారత్ (PM-JAY), ఉద్యోగుల మెడికల్ రీఇంబర్స్‌మెంట్లు వంటి పథకాల వాటా మొత్తం హెల్త్ బడ్జెట్‌లో 6 శాతం నుండి 9.9 శాతానికి పెరిగింది. ముఖ్యంగా గ్రామీణ, పట్టణ ప్రాంతాల్లోని ప్రాథమిక ఆరోగ్య కేంద్రాల బడ్జెట్‌ను రూ. 0.5 లక్షల కోట్ల నుండి రూ. 1.4 లక్షల కోట్లకు పెంచడం ద్వారా క్షేత్రస్థాయిలో వైద్య సేవలు మరింత అందుబాటులోకి వచ్చాయి. ప్రజల్లో పెరిగిన అవగాహన కారణంగా ప్రైవేట్ హెల్త్ ఇన్సూరెన్స్ రంగం కూడా 3.4 శాతం నుండి 9.2 శాతానికి వృద్ధి చెందిందని నివేదిక పేర్కొంది.