అంతర్జాతీయ రాజకీయాల్లో అమెరికా-ఇరాన్ దేశాల మధ్య ఉద్రిక్తతలు మునుపెన్నడూ లేనంతగా ముదిరాయి. అమెరికా అధ్యక్షుడు డొనాల్డ్ ట్రంప్ను(Donald Trump) అంతమొందించడానికి ఇరాన్(Iran) ఒక పక్కా ‘కిల్-ప్లాట్’ (హత్యాయత్నం కుట్ర) వేసిందంటూ ఇజ్రాయెల్ సంచలన ఇంటెలిజెన్స్ ఆధారాలను అమెరికా రక్షణ ప్రధాన కార్యాలయం పెంటగాన్కు అప్పగించింది. ఇరాన్ మాజీ సుప్రీం లీడర్ అలీ ఖమేనీ వారం రోజుల పాటు సాగిన అంత్యక్రియల ఊరేగింపుల సమయంలోనే ఇరాన్ ఈ కుట్రకు తెరలేపినట్లు నివేదికలు చెబుతున్నాయి.
గతంలో ట్రంప్ హయాంలో ఇరాన్ టాప్ జనరల్ ఖాసీం సులేమానీని అమెరికా డ్రోన్ దాడితో హతమార్చిన సంగతి తెలిసిందే. అప్పటినుంచి ట్రంప్పై కక్ష పెంచుకున్న ఇరాన్, ఖమేనీ అంత్యక్రియల ప్రదర్శనలోనూ “మేము ట్రంప్ను చంపుతాము” అంటూ బహిరంగంగా బ్యానర్లు ప్రదర్శించి ప్రతీకార జ్వాలలను రగిల్చింది. ఈ రహస్య ఇంటెలిజెన్స్ రిపోర్ట్ అమెరికా, ఇరాన్ దేశాల మధ్య కుదిరిన తాత్కాలిక కాల్పుల విరమణ ఒప్పందాన్ని తీవ్ర సందిగ్ధంలోకి నెట్టింది. ఇరాన్పై మునుపటి కంటే తీవ్రమైన దాడులు చేయాలా వద్దా అని ట్రంప్ ఆలోచిస్తున్న తరుణంలో, ఇజ్రాయెల్ నుంచి వచ్చిన ఈ పక్కా హెచ్చరిక ఆయన నిర్ణయాలను తీవ్రంగా ప్రభావితం చేస్తోంది.
అయితే, అమెరికా ఇంటెలిజెన్స్ వర్గాలు దీనిపై గతంలో కొంత సమాచారాన్ని సేకరించినప్పటికీ, ఒక నిర్దిష్ట కుట్ర గురించి ఇజ్రాయెల్ ఇచ్చిన సమాచారం మాత్రం సరికొత్తది మరియు అత్యంత ప్రమాదకరమైనదిగా అధికారులు భావిస్తున్నారు. మరోవైపు నాటో (NATO) సదస్సులో భాగంగా విలేకరులతో మాట్లాడిన అధ్యక్షుడు డొనాల్డ్ ట్రంప్ సైతం, “ఇరాన్ టార్గెట్ లిస్ట్లో నేనే నంబర్ వన్” అని స్వయంగా అంగీకరించడం గమనార్హం. ఈ పరిణామాల నేపథ్యంలో, ఇజ్రాయెల్ ప్రధానమంత్రి బెంజామిన్ నెతన్యాహు, అమెరికా అధ్యక్షుడు డొనాల్డ్ ట్రంప్ నిరంతరం సంప్రదింపులు జరుపుతున్నారు.
గల్ఫ్ ప్రాంతంలో అమెరికా సైనిక కదలికలు, రక్షణ వ్యూహాలపై ఇరు దేశాల అధినేతలు పూర్తిస్థాయిలో సమన్వయం చేసుకుంటున్నట్లు ఇజ్రాయెల్ ప్రధాని కార్యాలయం ధృవీకరించింది. ట్రంప్ ప్రాణాలకే ముప్పు పొంచి ఉన్న ఈ ‘కిల్-ప్లాట్’ వ్యవహారం వెలుగులోకి రావడంతో అమెరికా సీక్రెట్ సర్వీస్ మరియు ఇంటెలిజెన్స్ విభాగాలు నిఘాను అత్యంత కఠినతరం చేశాయి. ఇరాన్ కుట్రలను తిప్పికొట్టేందుకు గల్ఫ్ తీరంలో అమెరికా తన యుద్ధ నౌకలను, రక్షణ దళాలను మరింత అప్రమత్తం చేసింది.
సంబంధిత కథనాలు
అదే వర్గం నుండి
