దేశవ్యాప్తంగా పెను సంచలనం సృష్టిస్తున్న ‘నీట్’ (NEET) పరీక్ష పేపర్ లీకేజీల వ్యవహారం ఇప్పుడు కేంద్ర ప్రభుత్వం వర్సెస్ దేశ యువత అన్నట్లుగా మారింది. నీట్ లీకేజీలు, విద్యా వ్యవస్థలోని అవకతవకలకు నిరసనగా యువత, విద్యార్థుల నేతృత్వంలో ఏర్పాటైన ‘కాక్రోచ్ జనతా పార్టీ’ (CJP) ఢిల్లీ వేదికగా చేపట్టిన ఆందోళనలు దేశ రాజకీయాల చిత్రాన్నే మార్చివేశాయి. అయితే, ప్రారంభంలో ఈ ‘కాక్రోచ్’ (సీజేపీ) ఉద్యమాన్ని కేంద్ర వ్యూహకర్తలు తీవ్రంగా తక్కువ అంచనా వేసి పెద్ద పొరపాటు చేశారనే విశ్లేషణలు ఇప్పుడు రాజకీయ వర్గాల్లో బలంగా వినిపిస్తున్నాయి.

Also Read:  కాపులు జగన్ పాలేరులా.. ఊడిగం చేయాలా..?

సాధారణంగా దేశంలో నిరుద్యోగం పైనో, పరీక్షల అక్రమాల పైనో విద్యార్థులు రోడ్లపైకి వస్తే.. అది కొద్దిరోజుల్లో సద్దుమణుగుతుందని పాలకులు భావిస్తుంటారు. సీజేపీ నిరసనల విషయంలోనూ కేంద్రం అదే తప్పు చేసినట్లు కనిపిస్తోంది. ఇదో చిన్న విద్యార్థి సంఘం, కొద్దిరోజులు ఆందోళన చేసి వెళ్ళిపోతారు అనుకున్నారు. అందుకే ప్రారంభంలో వారి డిమాండ్లను పెద్దగా పట్టించుకోకపోగా, పోలీసులు లాఠీలతో, కన్నీటి వాయువుతో అణచివేయాలని చూశారు. కానీ, ఆ అణచివేత కాస్తా విద్యార్థుల్లో మరింత కసిని పెంచింది. జంతర్ మంతర్ వద్ద రాజుకున్న చిన్న నిప్పుకణిక.. చూస్తూనే దేశవ్యాప్త దావాగ్నిలా మారుతుందని బహుశా ఇంటెలిజెన్స్ వర్గాలు కూడా ఊహించి ఉండవు.

ఎప్పుడైతే సీజేపీ ప్రారంభించిన ఈ విద్యార్థి ఉద్యమానికి దేశ ప్రధాన ప్రతిపక్షమైన కాంగ్రెస్ పార్టీ నేరుగా తన మద్దతు ప్రకటించిందో.. అప్పటివరకు విద్యార్థి ఆందోళనగా ఉన్న సీన్ కాస్తా దేశవ్యాప్త రాజకీయ పోరాటంగా రూపాంతరం చెందింది. లోక్‌సభ ప్రతిపక్ష నేత రాహుల్ గాంధీ స్వయంగా విద్యార్థులకు అండగా నిలబడి, ప్రధానమంత్రి నివాస ముట్టడికి పిలుపునివ్వడంతో ఢిల్లీ అక్షరాలా స్తంభించిపోయింది. గత 12 ఏళ్లలో ఎన్నడూ లేని విధంగా కాంగ్రెస్ ఇంతటి దూకుడును ప్రదర్శించడంతో కేంద్ర సర్కార్ పూర్తిగా డిఫెన్స్‌లో పడిపోయింది. అంతవరకు సైలెంట్‌గా ఉన్న నేషనల్ మీడియా ఛానళ్లు కూడా లైవ్ ప్రసారాలు ఇవ్వక తప్పని పరిస్థితి ఏర్పడింది.

Also Read:  లంక టూర్‌కు టీమిండియా రెడీ.. ఈ వారంలోనే టెస్ట్ స్క్వాడ్ ప్రకటన..?

ప్రభుత్వం వెంటనే దిగివచ్చి, పార్లమెంట్‌లో చర్చకు సిద్ధమని ప్రకటించాల్సి వచ్చిందంటే.. ఈ ఉద్యమ తీవ్రత ఏ స్థాయిలో ఉందో అర్థం చేసుకోవచ్చు. ఈ ఉద్యమం పాలకులకు నేర్పుతున్న అతిపెద్ద పాఠం ఏంటంటే.. దేశవ్యాప్తంగా యువతలో ఒక స్పష్టమైన మార్పు వచ్చింది. గతంలో లాగా కేవలం సోషల్ మీడియాలో పోస్టులు పెట్టి ఊరుకోవడం లేదు.. తమ భవిష్యత్తుకు ముప్పు వాటిల్లితే రోడ్లపైకి వచ్చి పోరాడటానికి సిద్ధమని యువత నిరూపిస్తోంది. నీట్ పేపర్ లీకేజీ అనేది ఒక పరీక్షకు సంబంధించిన సమస్య కాదు.. అది దేశంలోని కోట్లాది మంది విద్యార్థుల, వారి తల్లిదండ్రుల నమ్మకానికి సంబంధించిన సమస్య. ఈ విషయాన్ని ప్రధాని మోదీ కూడా గుర్తించి.. దీనిని “ఘోర పాపం” అని ఒప్పుకోవాల్సి వచ్చింది. కులాలు, మతాలు, ప్రాంతాలకు అతీతంగా విద్యార్థి లోకం ఏకం కావడం.. దేశ రాజకీయాల్లో ఒక సరికొత్త మార్పుకు సంకేతంగా మారుతోంది.