ఆంధ్రప్రదేశ్లోని చిత్తూరు, పార్వతీపురం మన్యం వంటి సరిహద్దు జిల్లాల ప్రజలకు గత 20 ఏళ్లుగా అడవి ఏనుగుల బెడద ఒక తీరని శాపంగా మారింది. గజరాజుల మందలు అడవుల నుంచి జనవాసాల్లోకి, పంట పొలాల్లోకి చొరబడి ఎకరాలకు ఎకరాలు పంటలను నాశనం చేయడమే కాకుండా, మనుషులపై దాడులు చేస్తూ ప్రాణాలు తీస్తున్నాయి. గత ప్రభుత్వాలు దీనికి సరైన పరిష్కారం చూపలేకపోయినప్పటికీ, అటవీ శాఖ మంత్రిగా బాధ్యతలు చేపట్టిన పవన్ కళ్యాణ్ ఈ సమస్యపై ప్రత్యేక దృష్టి సారించారు. ఇందులో భాగంగానే పొరుగు రాష్ట్రమైన కర్ణాటక ప్రభుత్వంతో సంప్రదింపులు జరిపి, అత్యంత శిక్షణ పొందిన ‘కుంకీ’ ఏనుగులను ఏపీకి రప్పించారు.
చాలామంది ‘కుంకీ’ అనేది ఒక ప్రత్యేక జాతికి చెందిన ఏనుగులని భావిస్తారు, కానీ నిజానికి కుంకీ అనేది ఏనుగుల రకం కాదు, అడవి ఏనుగులకు ఇచ్చే ఒక ప్రత్యేకమైన ‘శిక్షణ’. అడవి ఏనుగుల గుంపులలో అత్యంత బలమైన, చురుకైన ఏనుగులను పట్టుకుని అటవీ శాఖ అధికారులు వాటికి మనుషుల మాట వినేలా కఠినమైన శిక్షణ ఇస్తారు. సాధారణ అడవి ఏనుగులు మనుషులను చూస్తే దాడి చేస్తాయి లేదా భయపడి పారిపోతాయి, కానీ ఈ కుంకీ ఏనుగులు తమ మావటి వాడు చెప్పే ప్రతి సైగను, కమాండ్ను తూచా తప్పకుండా పాటిస్తాయి. ఎంతటి భయానక మరియు క్లిష్ట పరిస్థితులు ఎదురైనా ఇవి అస్సలు భయపడవు, అందుకే వీటిని అటవీ శాఖకు రక్షణ సిబ్బందిలా పనిచేసే ‘కమాండో గజరాజులు’ అని పిలుస్తారు.
ఈ కుంకీ ఏనుగుల వల్ల సరిహద్దు ప్రాంతాల రైతులకు, ప్రజలకు ఎంతో లాభం చేకూరనుంది. పంట పొలాలపై లేదా సరిహద్దు గ్రామాల్లోకి వచ్చే క్రూరమైన, మొండి అడవి ఏనుగులను ఈ కుంకీ ఏనుగులు శారీరకంగా ఎదుర్కొని, భయపెట్టి, తిరిగి అడవిలోకి నెట్టేస్తాయి. అలాగే, పంటలను నాశనం చేసే మొండి ఏనుగులకు మత్తుమందు ఇచ్చి బంధించాల్సి వచ్చినప్పుడు సాధారణ మనుషులు వాటి దగ్గరకు వెళ్లలేరు కాబట్టి, అలాంటి వ్యూహాత్మక ఆపరేషన్లలో ఈ కుంకీల సాయం తీసుకుంటారు. ఇటీవలే చిత్తూరు జిల్లా బంగారుపాళ్యంలో జరిగిన ‘ఆపరేషన్ కుంకీ’ వంద శాతం విజయవంతం కాగా, ప్రస్తుతం మంగళగిరి క్యాంపు కార్యాలయానికి చేరుకున్న ఈ గజరాజులను త్వరలోనే మన్యం జిల్లాలోని గుచ్చిమి క్యాంపునకు తరలించి అక్కడి ఏనుగుల బెడదకు శాశ్వతంగా బ్రేకులు వేయబోతున్నారు.
సంబంధిత కథనాలు
అదే వర్గం నుండి
