తెలంగాణ ముఖ్యమంత్రి ఎనుముల రేవంత్ రెడ్డిపై లైవ్ డిబేట్‌లో అత్యంత అనుచిత వ్యాఖ్యలు చేసిన వ్యవహారంలో ఏపీకి చెందిన వైఎస్సార్ కాంగ్రెస్ పార్టీ (YSRCP) అధికార ప్రతినిధి యనమల నాగార్జున యాదవ్‌ను తెలంగాణ పోలీసులు అరెస్ట్ చేశారు. అదే సమయంలో ఈ వివాదాస్పద చర్చా కార్యక్రమాన్ని నడిపించిన ప్రముఖ సీనియర్ జర్నలిస్ట్, సాక్షి టీవీ యాంకర్ కొమ్మినేని శ్రీనివాసరావుపై కూడా పోలీసులు క్రిమినల్ కేసు నమోదు చేయడంతో మీడియా మరియు రాజకీయ వర్గాల్లో తీవ్ర కలకలం రేగుతోంది.

Also Read: ‘ఉపా’ దెబ్బకు రూట్ మార్చిన జడ శ్రవణ్..?

సాక్షి టీవీలో జరిగిన ఒక రాజకీయ చర్చా కార్యక్రమంలో వైసీపీ అధికార ప్రతినిధి నాగార్జున యాదవ్ మాట్లాడుతూ.. తెలంగాణ సీఎం రేవంత్ రెడ్డిని ఉద్దేశించి “స్విగ్గీ, జొమాటో డెలివరీ బాయ్” అంటూ తీవ్రమైన వ్యాఖ్యలు చేశారు. దేశంలోనే అత్యంత దారుణంగా ఒక డెలివరీ బాయ్ ముఖ్యమంత్రి అయ్యాడంటూ, ఆయనకు కనీసం ప్రభుత్వ జీవోలు కూడా చదవడం రాదంటూ ఏకవచనంతో తీవ్రంగా కించపరిచారు. ముఖ్యమంత్రి హోదాలో ఉన్న వ్యక్తిపై ఈ విధమైన అసభ్యకర వ్యాఖ్యలు చేయడంపై టీపీసీసీ సోషల్ మీడియా రాష్ట్ర కన్వీనర్ కైలాష్ సజ్జన్ తీవ్ర ఆగ్రహం వ్యక్తం చేస్తూ హైదరాబాద్ బేగంబజార్ పోలీస్ స్టేషన్‌లో ఫిర్యాదు చేశారు.

ఈ ఫిర్యాదు ఆధారంగా రంగంలోకి దిగిన బేగంబజార్ పోలీసులు.. ఆంధ్రప్రదేశ్‌లోని గుంటూరులో ఉన్న నాగార్జున యాదవ్ నివాసానికి వెళ్లి ఆయనను అదుపులోకి తీసుకుని హైదరాబాద్ తరలించారు. ఈ కేసు కేవలం వ్యాఖ్యలు చేసిన నాయకుడితోనే ఆగలేదు. సదరు టీవీ డిబేట్‌ను హోస్ట్ చేసిన సీనియర్ యాంకర్ కొమ్మినేని శ్రీనివాసరావు (KSR) పేరును కూడా పోలీసులు ఎఫ్ఐఆర్‌లో చేర్చారు. నాగార్జున యాదవ్ ముఖ్యమంత్రిపై పదే పదే అభ్యంతరకర వ్యాఖ్యలు చేస్తున్నా, లైవ్‌లో యాంకర్‌గా ఉన్న కొమ్మినేని ఆయనను కనీసం వారించే ప్రయత్నం చేయలేదని, ఆ వ్యాఖ్యలను అడ్డుకోకుండా ప్రోత్సహించేలా వ్యవహరించారని ఫిర్యాదుదారుడు పేర్కొన్నారు. రాజ్యాంగబద్ధమైన పదవిలో ఉన్న ముఖ్యమంత్రి గౌరవానికి భంగం కలిగించేలా సాగిన ఈ చర్చను నియంత్రించనందుకు గాను కొమ్మినేని శ్రీనివాసరావుపై కూడా బేగంబజార్ పోలీసులు క్రిమినల్ కేసు నమోదు చేశారు.

Also Read: ద్రావిడ్‌కు ఇంగ్లండ్ టెస్ట్ కోచ్ ఆఫర్..?

ప్రధాన నిందితుడిగా ఉన్న వైసీపీ నేత నాగార్జున యాదవ్‌ను పోలీసులు ఇప్పటికే అరెస్ట్ చేయడంతో, ఇప్పుడు అందరి దృష్టి యాంకర్ కొమ్మినేని శ్రీనివాసరావుపై పడింది. ఇటువంటి సున్నితమైన విషయాల్లో డిబేట్ నిర్వాహకులకు కూడా బాధ్యత ఉంటుందని కాంగ్రెస్ శ్రేణులు చట్టపరమైన చర్యలను సమర్థిస్తుండగా.. ఇది మీడియా హక్కులను కాలరాయడమేనని మరికొందరు అభిప్రాయపడుతున్నారు. పోలీసులు ఆయనకు కేవలం నోటీసులు జారీ చేసి విచారిస్తారా లేక నాగార్జున యాదవ్ తరహాలోనే నేరుగా అరెస్ట్ చేసే అవకాశం ఉందా అనేది రాబోయే పరిణామాలను బట్టి తేలనుంది. మొత్తానికి ఈ వైసీపీ నేత అరెస్ట్, సాక్షి యాంకర్‌పై కేసు వ్యవహారం రెండు తెలుగు రాష్ట్రాల్లోనూ హాట్ టాపిక్‌గా మారింది.