భారత క్రికెట్ అభిమానులు ఎంతగానో ఎదురుచూస్తున్న రాబోయే శ్రీలంక పర్యటనకు సంబంధించి ఒక కీలక అప్‌డేట్ వచ్చింది. లంకతో జరగబోయే రెండు టెస్టుల సిరీస్ కోసం భారత సీనియర్ సెలెక్షన్ కమిటీ ఈ వారంలోనే జట్టును ప్రకటించే అవకాశం ఉంది. చీఫ్ సెలెక్టర్ అజిత్ అగార్కర్ నేతృత్వంలోని కమిటీ.. ఇప్పటికే ఇంగ్లాండ్‌లో జరిగిన వన్డే సిరీస్ ముగిసిన తర్వాత దీనిపై ప్రాథమికంగా చర్చలు జరిపింది, త్వరలోనే అధికారిక సమావేశం నిర్వహించి స్క్వాడ్‌ను ఫైనల్ చేయనుంది. ఆగస్టు 15 నుండి గాలే వేదికగా ఈ ప్రతిష్టాత్మక టెస్ట్ సిరీస్ ప్రారంభం కానుంది.

Also Read: లోపం ఎక్కడ..? చంద్రబాబును ద్వేషించే అధికారికి కీలక పోస్టింగ్.!

ఈ స్క్వాడ్ ఎంపికలో సెలెక్టర్లకు స్టార్ ఆల్‌రౌండర్ వాషింగ్టన్ సుందర్ గాయం పెద్ద సమస్యగా మారింది. ఇంగ్లాండ్‌తో జరిగిన వన్డే సిరీస్‌లో సుందర్ కుడి హ్యామ్‌స్ట్రింగ్ (Hamstring) గాయానికి గురయ్యాడు. దీనివల్ల లార్డ్స్‌లో జరిగిన ఆఖరి వన్డేకు కూడా అతడు దూరమయ్యాడు. ప్రస్తుతం లండన్‌లో స్కాన్లు చేయించుకున్న సుందర్, తదుపరి ఫిట్‌నెస్ క్లియరెన్స్ కోసం బెంగళూరులోని బీసీసీఐ సెంటర్ ఆఫ్ ఎక్సలెన్స్ (CoE) కు వెళ్లనున్నాడు. ఒకవేళ ఇది కేవలం గ్రేడ్-1 ఇంజ్యూరీ అయినప్పటికీ, అతడు పూర్తి ఫిట్‌నెస్ సాధించడానికి కనీసం రెండు వారాల సమయం పడుతుంది.

భారత జట్టు ఆగస్టు 4నే లంకకు పయనం కానుండటంతో, సుందర్ లభ్యతపై సెలెక్టర్లు తీవ్రంగా ఆలోచిస్తున్నారు. గత నెలలో అఫ్గానిస్తాన్‌తో జరిగిన వన్డే సిరీస్/టెస్ట్ జట్టుతో పోలిస్తే ఈసారి శ్రీలంక టూర్‌కు టీమిండియాలో కీలక మార్పులు జరగనున్నాయి. స్టార్ పేసర్ జస్ప్రీత్ బుమ్రాతో పాటు సీనియర్ ఆల్‌రౌండర్ రవీంద్ర జడేజా తిరిగి జట్టులోకి రావడం దాదాపు ఖాయంగా కనిపిస్తోంది. ఈ ఫార్మాట్‌లో జడేజానే మన నంబర్ 1 స్పిన్నర్ అని అగార్కర్ ఇప్పటికే స్పష్టం చేశారు. ఒకవేళ వాషింగ్టన్ సుందర్ ఫిట్‌నెస్ సాధించలేకపోతే.. విభిన్నమైన స్పిన్ అటాక్ కోసం హర్ష్ దూబేను కొనసాగిస్తారా లేక సారాంశ్ జైన్ లాంటి మరో ఆఫ్ స్పిన్నర్‌ను తీసుకుంటారా అనేది ఆసక్తికరంగా మారింది.

Also Read: నోటి దూలను క్షమించని విజయ్, ఎమ్మెల్యేల అరెస్ట్ అందుకే..!

మానవ్ సుతార్, కుల్దీప్ యాదవ్‌లు తమ స్థానాలను నిలబెట్టుకోనున్నారు. ప్రధాన కోచ్ గౌతమ్ గంభీర్ ఆధ్వర్యంలో టీమిండియా టెస్ట్ ఫార్మాట్‌లో ఆశించిన స్థాయిలో రాణించలేకపోయింది. గతంలో న్యూజిలాండ్, సౌతాఫ్రికా చేతిలో వైట్‌వాష్ అయిన భారత్‌కు.. వరల్డ్ టెస్ట్ ఛాంపియన్‌షిప్ (WTC) ఫైనల్ రేసులో నిలవాలంటే ఈ శ్రీలంక సిరీస్ అత్యంత కీలకం. శుభ్‌మన్ గిల్ నేతృత్వంలోని భారత జట్టు గాలే టెస్టుకు ముందు లంకలో ఒక నాలుగు రోజుల ప్రాక్టీస్ మ్యాచ్ కూడా ఆడనుంది. పేస్ విభాగంలో మహ్మద్ సిరాజ్, ప్రసిద్ధ్ కృష్ణలతో పాటు గుర్నూర్ బ్రార్ వంటి యువకులకు అవకాశం దక్కే ఛాన్స్ ఉంది.