వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి విశాఖపట్నం పర్యటన తీవ్ర ఉద్రిక్తతలకు దారితీసింది. పర్యటన సందర్భంగా భద్రతా విధుల్లో ఉన్న పోలీసులను, ఉన్నతాధికారులను సైతం లెక్కచేయకుండా వైసీపీ నాయకులు, కార్యకర్తలు ప్రవర్తించిన తీరుపై తీవ్ర విమర్శలు వ్యక్తమవుతున్నాయి. కాన్వాయ్ వెళ్లే సమయంలో శాంతిభద్రతలను కాపాడటానికి పోలీసులు ఎంతగా నిలువరిస్తున్నా, కనీసం వారి హెచ్చరికలను కూడా పట్టించుకోకుండా బారికేడ్లను తోసుకుంటూ, ఖాకీలను నెట్టివేస్తూ వైసీపీ శ్రేణులు అరాచకం సృష్టించారు.
విధుల్లో ఉన్న ఏసీపీ, సీఐ స్థాయి అధికారులను సైతం హేళన చేస్తూ దురుసుగా ప్రవర్తించడం పోలీస్ వర్గాల్లో తీవ్ర కలకలం రేపింది. నిజానికి వైసీపీ నేతలు పోలీసులపై ఇలా దౌర్జన్యానికి దిగడం ఇదే మొదటిసారి కాదు. కేవలం రెండు రోజుల క్రితమే శ్రీకాకుళం జిల్లాలో జగన్ పర్యటన సందర్భంగా విధుల్లో ఉన్న ఒక మహిళా సబ్ ఇన్స్పెక్టర్ (SI) అని కూడా చూడకుండా వైసీపీ గూండాలు ఆమెను చుట్టుముట్టి, బూతులు తిడుతూ పక్కకు నెట్టేసిన సంగతి తెలిసిందే. ఈ ఘటనపై మంత్రి నారా లోకేష్ ఇప్పటికే తీవ్రస్థాయిలో మండిపడ్డారు.
మహిళలను అవమానించడం వైసీపీ డీఎన్ఏలోనే ఉందంటూ, సొంత తల్లిని, చెల్లిని గెంటేసిన చరిత్ర జగన్రెడ్డిది అంటూ ఆయన ఘాటుగా విమర్శలు గుప్పించారు. ఆ ఘటన మరువకముందే నిన్న విశాఖపట్నంలో మళ్లీ అదే తరహాలో పోలీసుల వార్నింగ్లను బేఖాతరు చేస్తూ వైసీపీ శ్రేణులు రెచ్చిపోవడం వారి పాత అలవాట్లను గుర్తు చేస్తోంది. రాజకీయ విశ్లేషకుల అభిప్రాయం ప్రకారం.. 2019 నుండి 2024 వరకు అధికారంలో ఉన్నప్పుడు వ్యవస్థలను తమ గుప్పిట్లోకి తెచ్చుకున్న వైసీపీ నేతలకు, అధికారం పోయినప్పటికీ ఆనాటి ‘అధికార మదం‘ ఇంకా దిగలేదని స్పష్టమవుతోంది.
తాము ఏం చేసినా చట్టం చెల్లుతుందనే భ్రమలోనే ఉన్నారని నిన్నటి విశాఖ ఘటనలు నిరూపిస్తున్నాయి. అయితే ఈ వ్యవహారాలను కూటమి ప్రభుత్వం చాలా సీరియస్గా తీసుకుంటోంది. విశాఖ తోపులాట మరియు పోలీసుల వార్నింగ్లను ధిక్కరించిన వారిని మీడియా ఫుటేజ్, సీసీటీవీ ఆధారాల ద్వారా గుర్తించి, కఠిన చట్టపరమైన చర్యలు తీసుకోవడానికి పోలీస్ ఉన్నతాధికారులు రంగంలోకి దిగారు.
సంబంధిత కథనాలు
అదే వర్గం నుండి
